ԵՄ արտաքին գործերի և անվտանգության քաղաքականության գերագույն ներկայացուցիչ Ժոզեպ Բորելը կայցելի Ճապոնիա՝ մասնակցելու Ճապոնիա-ԵՄ ռազմավարական երկխոսության արտաքին և անվտանգության քաղաքականության առաջին հանդիպմանը։
Սպասվում է, որ նա կհանդիպի Ճապոնիայի արտգործնախարար Տակեշի Իվայայի հետ և կանցկացնի Ճապոնիայի և ԵՄ-ի միջև արտաքին քաղաքականության ռազմավարական երկխոսության առաջին հանդիպումը։ Բանակցությունների ընթացքում կքննարկվեն Ճապոնիայի և ԵՄ-ի միջև համագործակցությունը, մասնավորապես, անվտանգության ոլորտում, ինչպես նաև միջազգային և տարածաշրջանային բնույթի հարցեր։
Այցի ընթացքում կողմերը կհայտարարեն անվտանգության և պաշտպանության ոլորտում գործընկերության մասին, ինչպես նաև կվավերացնեն ռազմավարական գործընկերության մասին համաձայնագիրը։
Ըստ ճապոնական լրատվամիջոցների՝ խոսքը ծովային ու կիբերանվտանգության, ինչպես նաև տիեզերքում համագործակցության մասին է։ Բացի այդ, Բորելը նախատեսում է հանդիպել Ճապոնիայի պաշտպանության նախարար Գեն Նակատանիի հետ։
Ճապոնիան վերջերս ուշադրություն է դարձնում Եվրոպայի հետ հարաբերությունների զարգացմանը, այդ թվում՝ անվտանգության ոլորտում՝ հայտարարելով Եվրոպայի և Ասիայի անվտանգության անբաժանելիության մասին։ Kyodo գործակալությունը նշում է, որ կողմերը զարգացնում են համագործակցությունը Չինաստանի ծովային ակտիվության մտավախության ֆոնին։
Տոկիոյից հետո Բորելը կմեկնի Կորեայի Հանրապետություն։ Սեուլում նա կհանդիպի արտաքին քաղաքական և ռազմական գերատեսչությունների ղեկավարների հետ, ինչպես նաև կայցելի ԿԺԴՀ-ի հետ սահմանի ապառազմականացված գոտի։
